Listi yfir lagaval karókí söngvaranna

Undankeppni karókíkeppni vinnustaða á Ströndum verður haldin í Bragganum á Hólmavík á morgun og hefst klukkan 21:00. Flytjendur laganna hafa nú allir valið sér lag til flutnings og eru nöfn þeirra birt hér að neðan ásamt upplýsingum um hvaða lög þeir hafa valið. Þrettán keppendur eru skráðir til leiks og keppa fyrir tíu fyrirtæki og stofnanir. Í undankeppninni verður keppt um átta sæti sem eru laus í úrslitakeppninni og verður haldin eftir tvær vikur. Sérstök dómnefnd sér um að velja sjö bestu flytjendurna áfram og áhorfendur velja einn af þeim sex sem sitja eftir áfram í úrslitakeppnina.

Kynnir í undankeppninni verður Rúna Stína Ásgrímsdóttir og dómnefndin er skipuð Stefáni Jónssyni, sem bar sigur úr býtum í keppninni í fyrra fyrir Áhaldahús Hólmavíkurhrepps, ásamt Elsu Björk Sigurðardóttur og Sigríði Óladóttur. Bjarni Ómar Haraldsson heldur utan um tónlistina og skipulagninguna.