19/04/2024

Sundlaugin á Hólmavík tveggja ára

Í dag, 17. júlí, eru tvö ár liðin frá því sundlaugin á Hólmavík var fyrst tekin í notkun. Laugin hefur reynst afar vel og verið ágætlega sótt á þeim stutta tíma sem hún hefur verið í notkun. Að sögn Úlfars Heintze Pálssonar umsjónarmanns eru gestakomur í laugina í sumar heldur færri en á sama tíma í fyrra, en hefur að vísu verið að glæðast síðustu vikur. Úlfar segir að gestirnir láti ætíð mjög vel af heimsókninni í laugina sem er 25 metra keppnislaug, en auk hennar eru tveir heitir pottar, buslulaug og gufubað. Þegar strandir.saudfjarsetur.is kíktu við í dag var stór hópur gesta nýfarinn úr lauginni en nokkrir svömluðu um í heitu vatninu og höfðu það gott.

Að sögn Úlfars eru nokkrir fastagestir sem mæta að staðaldri í laugina og ekki síst í pottana, en heimamenn megi þó gjarnan vera enn duglegri við að nýta sér aðstöðuna. strandir.saudfjarsetur.is óska sundlauginni að sjálfsögðu til hamingju með afmælið og hvetur fólk til að nýta sér hana vel á komandi góðviðrisdögum.

Sundlaugin á Hólmavík

holmavik/580-sundlaug-2-arac.jpg

Ljósm. Arnar S. Jónsson