Hrafninn í uppáhaldi á Ströndum

Strandamenn virðast hafa töluvert dálæti á hrafninum, en hann varð efstur í skoðanakönnun á strandir.saudfjarsetur.is þar sem spurt var um viðhorf til nokkurra fugla og hvern þeirra menn hefðu í mestu uppáhaldi. Fékk hrafninn þar 100 atkvæði og varð efstur, en heiðlóan var skammt undan með 97 atkvæði. Í þriðja sæti varð krían með 55 atkvæði. Segja má að úrslitin komi nokkuð á óvart. Lundinn var í næstneðsta sæti með 17 atkvæði, en þau hefðu nú líklega verið fleiri ef spurt hefði verið um kofuna í staðinn fyrir lundann. Álftirnar kvakandi ráku svo lestina með 11 dygga stuðningsmenn.