Vond ráð hjá galdralækni

Nýverið var fjallað um það í heimsfréttunum að serbneskur maður hafi þurft að leita sér lækninga eftir misheppnaða tilraun til að hafa mök við broddgölt, en það hafði hann reynt eftir ráðleggingar galdralæknis. Maðurinn hafði átt vanda til of bráðs sáðláts og fékk þetta undarlega ráð hjá galdralækninum, en það fór ekki betur en svo að hann þurfti á sjúkrahús alblóðugur neðan mittis og með broddgaltanálar fastar á viðkvæmum stöðum. Í samtali sem strandir.saudfjarsetur.is átti við galdramann á Ströndum vegna fréttarinnar sagði hann að ef maðurinn hefði leitað ráða hjá Galdrasýningu á Ströndum þá hefði honum verið bent á að naga hvannarót undir fullu tungli, helst á hvítasunnunóttu eða bara drífa sig á næstu heilsugæslustöð.