Categories
Frétt

strandir.saudfjarsetur.is sigruðu í Liðsstjóraleiknum

Fernando Alonso tryggði sér í dag heimsmeistaratitil í Formúlu 1 kappakstri með öruggum akstri í Brasilíu á meðan Michael Schumacher kvaddi keppni með einhverjum besta akstri sínum á ferlinum. Strandamenn unnu líka titla í formúlunni í dag, því deildin strandir.saudfjarsetur.is sigraði glæsilega í Liðsstjóraleik vefjarins formula.is í æsispennandi keppni við næstu deild á eftir. strandir.saudfjarsetur.is lauk keppni með 35.408 stig, sem er 25,5 stigum meira en liðið í öðru sæti náði. Því eiga formúluspekingarnir í deildinni fyrir höndum mikla reisu til Hveragerðis einhvern tímann á næstu vikum með hótelgistingu, hátíðarkvöldverði, skemmtiatriðum o.fl.

Sigurvegari deildarinnar var liðið Sigurvegari 2006, en því er stjórnað af Jóni Gísla Jónssyni á Hólmavík. Þetta er annað árið í röð sem Jón Gísli vinnur formúlubikarinn, en hann er veittur þeim sem endar í fyrsta sæti í deildinni strandir.saudfjarsetur.is. Hann lét þó ekki þar við sitja því liðið Sigurvegari 2006 varð í 11. sæti í heildarkeppninni og Jón Gísli átti einnig liðið sem var í öðru sæti deildarinnar.