29/03/2024

Stjörnuleit galdramannsins

galdramaður af Ströndum skimar eftir plakatinuEinn galdramaðurinn á Ströndum varð fyrir því óláni í morgun að týna plakatinu af keppendum kvöldsins í Idol keppninni í kvöld. Hann var árrisull því veðurspáin hefur verið dyntótt undanfarið og fór því með vindgapann sinn yst á Tangann á Hólmavík til þess að gera tilraun til að stjórna veðrinu í dag. „Þetta er hábölvað," sagði galdramaðurinn þegar hann tilkynnti um ólánið. „Ég tapaði plakatinu einhversstaðar á tanganum, utan við sláturhúsið. Mig langar að biðja krakkana á Hólmavík að leita að því í dag, því mér er mjög annt um það því ég ætlaði að halda því á lofti í félagsheimilinu í kvöld og hvetja Heiðu óspart".

Galdramaðurinn segir að það séu fundarlaun fyrir plakatið en það sé auðþekkt því stimpill Galdrasýningar á Ströndum er á því. „Ég verð í Félagsheimilinu á Hólmavík í kvöld og því langar mig að biðja þann sem finnur það að skila mér því – sá sem gerir það fær bók í fundarlaun".

Allir krakkar á Hólmavík eru því hvattir til að leggja leið sína niðrá tanga í dag og skima eftir plakatinu. Það er einhversstaðar utan við sláturhúsið, eða við gömlu beinamjölsverksmiðjuna eða einhversstaðar í kringum Hlein eða bara í einhverjum garðinum við Höfðagötu. „Blessaður vertu, ég hef ekki hugmynd um hvar ég glopraði því, ég ráfaði þarna um allan tangann í morgun í leit að heppilegum stað til að hafa áhrif á veðrið. Það hlýtur bara að hafa dottið úr beltinu þar sem ég geymdi það," sagði galdramaðurinn af Ströndum að lokum.

.
Galdramaðurinn var við iðju sína á tanganum í morgun að galdra sæmilegt veður þegar hann varð fyrir því óláni að týna plakati af þeim stöllum, Heiðu Ólafs og Hildi Völu í Idol keppninni. Hann býður fundarlaun þeim sem finnur það en þarna náði ljósmyndari strandir.saudfjarsetur.is mynd af honum þar sem hann skimaði eftir því.