Segir Steingrímsfjörð magnaðan fuglaskoðunarstað

Breskur frönskukennari og áhugamaður um fuglaskoðun, Colin Humphrey, heldur því fram að Steingrímsfjörður sé einn allra áhugaverðasti fuglaskoðunarstaður landsins og aðgengi að mögnuðu og fjölbreyttu fuglalífi einstaklega gott. Colin var á Ströndum í vikunni og gisti nokkra daga á tjaldsvæðinu á Hólmavík og segir að fuglalíf við fjörðinn sé ótrúlega fjölbreytt. Hann fékk lánað reiðhjól á Hólmavík og hjólaði m.a. í sund í Bjarnarfjörð í fyrradag og skrásetti allar fuglategundir sem hann sá á leiðinni. Hann segir þessa dagstund hafa verið stórkostlega og einn hápunktur sinn í fuglaskoðun. Daginn áður fékk hann far með Sigurði Atlasyni framkvæmdastjóra Strandagaldurs frá Hólmavík til að skoða Kotbýli kuklarans. Á leiðinni var mikið spjallað og skrafað um náttúruskoðun og Colin ákvað að skrá niður allar fuglategundir sem hann tæki eftir við fjörðinn og afhenda Strandagaldri. Hér að neðan er listi yfir fuglategundirnar sem Colin skrásetti.

Að sögn Sigurðar er það dýrmætt að fá áhugafólk um fuglaskoðun til að vera þátttakendur við þróun náttúruskoðunar á svæðinu, en unnið er að undirbúningi fyrir alhliða náttúruskoðunarverkefni við Steingrímsfjörð og því þarf að skrásetja sem mest af fugla-, sela- og hvalalífi við fjörðinn.