Háhyrningar í Steingrímsfirði

Nú er ekki gott að vera selur  í Steingrímsfirði því hópur háhyrninga er að lóna út með Selströndinni, en eins og allir vita þykir þeim eins og mörgum manninum selkjöt algert lostæti. Háhyrningar eru ægilegustu rándýr jarðarinnar, margfalt öflugri en ljón og tígrisdýr, en veiðisvæðið er ólíkt. Háhyrningar eru einu skepnurnar fyrir utan manninn sem geta drepið steypireyði, en láta sér þó oftast nægja að drepa kálfa og oftar sjálfsagt kálfa minni reyðarhvala eins og t.d. gráhvals, en fyrir kemur að þeir veiði fullorðna hvali.

Þegar háhyrningar veiða seli leika þeir sér að bráðinni líkt og köttur að mús, kasta þeim jafnvel í loft upp og slá þá svo með gríðarstórum sporðinum áður en selurinn lendir í sjónum aftur. Háhyrningar geta orðið 9,5 til 10 metra langir  og allt að 9 tonn á þyngd. Þeir geta orðið 100 ára gamlir en meðalaldur varla nema 50 ár. Hornið á törfunum nær allt að tveggja metra hæð, en er talsvert lægra á kúnum.

Meðfylgjandi myndir voru teknar við Bassastaði upp úr klukkan sex í gærdag og eins og sést á einni myndinni  þá voru þeir stutt frá trjágarðinum hennar Lilju á Bassastöðum. Í hópnum voru þrír eða fjórir hvalir þar af einn kálfur.

Háhyrningar á Steingrímsfirði – Ljósm. Guðbrandur Sverrisson