Categories
Frétt

Galdramaður sendur til Afríku?

Galdramenn hyggja á á útrásDraugar, sem sumir líkjast helst nagdýrum, hafa hrætt Bingu wa Mutharika, forseta Malaví, úr 300 herbergja höll sinni í höfuðborginni Lilongwe. Mutharika kemur nú aðeins í höllina í björtu til að sinna vinnu sinni. Þetta kemur fram á fréttavef BBC. Strandagaldur brást skjótt við þegar fréttist af vanda Hr. Bingu og sendi út tafarlaust boð til Malaví og bauðst til að senda galdramann af Ströndum í fullum skrúða til að ná öruggum og skjótum árangri, og láta hann kveða niður alla óvætti og drauga úr öllum skúmaskotum hallarinnar.

„Þetta getur tekið dágóða stund," sagði galdramaðurinn þegar tíðindamaður strandir.saudfjarsetur.is hitti hann við fjöruborðið, „ég mun reyna mitt besta og vinna í því dag og nótt ef til kemur," bætti hann við þar sem hann var að safna réttum náttúruefnum í galdurinn fyrir þessa mögulegu útrás áður en hafísinn leggur að landi á Ströndum og byrgir allar fjörur. „Þetta er heilmikið ferðalag með talsverðan farangur, en Hr. Bingu ætti að geta aflað fjár fyrir vinnuna og ferðalagið á einhvern máta".

Þessi tiltekni galdramaður hefur aflað sér talsverðra reynslu undanfarin ár og margur draugurinn hefur þurft að lúta í sandinn eftir meðferð hans. „Verst hvað mér er illa við nagdýr, en það ætti að venjast, svo kvíði ég auðvitað svoldið hitanum. Það getur orðið skrambanum heitara í skinninu hérna heima, hvað þá þarna suðurfrá. Það veitir heldur ekkert af hverri krónu til að geta opnað annan áfanga Galdrasýningar á Ströndum með glæsibrag í sumar, þannig að ég er til þegar Hr. Bingu er til," sagði galdramaðurinn af Ströndum að lokum um leið og hann dró að sér andann og stakk sér ofan í eina þarahrúguna.

Heimasíða Galdrasýningar á Ströndum er www.vestfirdir.is/galdrasyning

.
Draugagangurinn á sér stað í forsetahöllinni í Lilongwe, höfuðborg Malaví. Höllin hefur 300 loftkæld herbergi auk fjölda annara sala.