by 
Galdrasýning á Ströndum tekur þátt í ráðstefnu um evrópska galdrasögu í Vardö í N-Noregi um næstkomandi helgi. Þetta er í annað sinn sem fulltrúi Strandagaldurs mætir á þessa ráðstefnuröð í Noregi, en í Vardö er stefnt að því að byggja upp galdrasýningu með aðstoð Strandagaldurs. Að þessu sinni verður fulltrúi Strandagaldurs í Vardö Magnús Rafnsson sagnfræðingur og hann mun fjalla um íslenska galdrastafi og galdraskræður í fyrirlestri sínum. Aðstandendur galdraverkefnisins í Noregi heimsóttu Strandir heim í vor og kynntu sér uppbyggingu Strandagaldurs í menningartengdri ferðaþjónustu á svæðinu.
Á ráðstefnunni tala fræðimenn og leikmenn frá Noregi, Svíþjóð, Finnlandi og Þýskalandi auk Magnúsar og fjalla um galdramál í Evrópu út frá mörgum þáttum. Mikil dagskrá fer fram í Vardö í tengslum við ráðstefnuna og búist er við miklum fjölda gesta. Allar nánari upplýsingar má finna á vefsíðu Heksekonferansen. www.heksekonferansen.no. Ljósmyndirnar að neðan voru teknar af Sigurði Atlasyni á ráðstefnunni í Vardö á síðasta ári.
Frá Vardö
Frá einleik um galdraofsóknirnar í Vardö
Leiðsögumenn í virki norska hersins í Vardö
Einleikur Lóa á Hóli – Galdramaðurinn og svínið
Bærinn Vardö er austasti bær Noregs og er á samnefndri eyju rétt undan landi
Ljósm.: Sigurður Atlason
