29/03/2024

Jólakreppuþula Indriða á Skjaldfönn

Syðra hafa menn hópast á friðsamlega mótmælafundi á Austurvelli á laugardögum kl. 15:00 upp á síðkastið og fréttaritari strandir.saudfjarsetur.is rakst á nokkra Strandamenn þar um síðustu helgi sem gerðu þátttöku í mótmælunum að hluta af helgarferð suður. Yfirskrift fundanna hefur verið Breiðfylking gegn ástandinu og hafa fundarmenn einkum krafist afsagnar stjórnar Seðlabankans og kosninga. Aðrir grípa síðan til stílvopnsins í mótmælaskyni og Indriði bóndi Aðalsteinsson á Skjaldfönn við Ísafjarðardjúp sendi vefnum eftirfarandi jólakreppuþulu:

Jólakreppa

Nú er að koma kreppujólin,
krakkar engir fagna því.
Í skuldamyrkrið sest er sólin,
sætindi og gjafir fyrir bí.
Leppalúði og Grýla gamla
ganga í stjórnarráði laus.
Situr uppi á Svörtuloftum
svipljótt tröll með úfinn haus.
Þjóðin ekki þessi kaus,
því er fólk með sköll og raus.

Boðar nýár betri tíð,
brauð og hunang fyrir lýð,
freyðivín og frábær teiti,
flugelda á hverju leiti,
eins og fyrri öldum á?
Erfitt er um slíkt að spá,
við verðum bara að bíða og sjá.

Indriði Aðalsteinsson, Skjaldfönn