by 
Samkvæmt rannsóknum færustu sálfræðinga er dagurinn í dag, 23. júní, besti og skemmtilegasti dagur ársins 2007. Veðrið er að jafnaði frekar gott þennan dag, sólin hátt á lofti og dagurinn langur, hásumarið og sumarfríið framundan eða nýbyrjað, þannig að flestir eru áhyggjulausari og glaðari í bragði en gengur og gerist. Þunglyndi vorsins yfir að ekki hafi tekist að ljúka verkefnum vetrarins er um garð gengið og menn sætta sig við að ekkert fái breytt því sem liðið er. Þeir sem þurfa eru búnir að ná sér í lyf fyrir frjóofnæminu og langflestir búnir að þrífa grillið og koma því í stand. Helgin er líka að hefjast, sem gleður alla góða menn.
Blíðskaparveðrið á Ströndum í dag gefur fulla ástæðu til að ætla að þetta geti allt saman gengið eftir.
Samkvæmt sömu snillingum var 22. janúar versti dagur ársins 2007, þannig að einnig er hæfilega langt um liðið frá honum. Kvef eða flensa herjar þá væntanlega á einhvern í fjölskyldunni og hátíðarskapið vegna jólanna er algjörlega horfið um það leyti. Við bætast yfirþyrmandi áhyggjur af jólaskuldunum og leiði yfir því að ekki tókst að standa við nýársheitin sem hafa venjulega verið svikin fyrir þennan dag. Skammdegið og veðurfarið hefur einnig slæm áhrif á fólk á þessum degi. Hann var á mánudegi þetta árið svo að heil vinnuvika var framundan og verulegur skortur á hressu og skemmtilegu fólki til að lífga upp á tilveruna.
