by 
Nú nýverið var birt frétt hér á strandir.saudfjarsetur.is þar sem sagði frá kvikmyndatökumönnum á ferð um Strandir. Komið hefur í ljós að aðalleikkona myndarinnar, Martina Jacova, er stórstjarna og mjög virt leikkona og fyrirsæta í sínum bransa. Notar hún listamannsnafnið Kyla Cole í þeim kvikmyndum og tímaritum sem hún kemur fram í. Frá því á sunnudag þegar fréttin birtist hafa u.þ.b. 4,000 manns lesið fréttina. Það er svipaður áhugi og þegar Mick Jagger heimsótti landann um árið.
Gapaldursritið DV, sem gefið er út í Reykjavík, slær fréttinni upp á forsíðu blaðsins í dag og gerir tilraun til að draga leikkonuna og Strandavininn Martinu Jacovu niður svaðið fyrir það eitt að bera hörund sitt lítið eitt í kvikmyndum. Margar aðrar stjörnur eru þó þekktar að öðru eins, s.s. Michael Enzio (Sylvester Stallone) sem hóf feril sinn í erótískri mynd (Italian Stallion) og Louise Veronica Ciccone (Madonna) sem jók frama sinn við gerð erótískra myndbanda. Þau Stallone og Madonna hafa ekki enn sýnt Strandamönnum þann heiður að heimsækja þá og gera listaverk sín þar um slóðir, en vonandi hefur kollegi þeirra Kyla Cole brotið ísinn. Þess má og geta að hin virta bandaríska leikkona Demetria Guines (Demi Moore) sat fyrir í karlaritum áður en hún hóf kvikmyndaferil sinn og lék meðal annars í kunnri erótískri kvikmynd, Disclosure, á móti Michael Douglas. Faðir Michaels, Kirk Douglas, hét Issur Danielovitch Demsky áður en hann fór að fást við kvikmyndaleik, en þeir feðgar eru af Hvít-Rússneskum ættum.
Enginn þessara frægu listamanna hefur verið skammaður fyrir að vera klámmyndaleikari, en það má vera að á upphrópunarritinu DV sé litið svo á að hæfileikaríkt fólk frá Austur Evrópu í dag, eins og Strandavinurinn og Slóvakinn Martina Jacova, séu eingöngu annars flokks listamenn og starfi í vafasömum kvikmyndageira.
Það er óskandi að Martina Jacova (Kyla Cole) heimsæki Strandamenn aftur hið fyrsta og lýsi upp náttúru og mannlíf á Ströndum með nálægð sinni, fegurð og hæfileikum. Heimamenn taka henni örugglega fagnandi og heilsa henni opnum örmum að Strandamannasið og bjóða hana hjartanlega velkomna.
Eins og sjá má þá var Martina Jacova kappklædd á Ströndum
Tengdar fréttir:
Assassin 62
Assassin 62
