![](wp-content/uploads/hrutafjordur/skolinn2005/150-skolinn_bordeyri.jpg)
Um áratuga skeið fækkaði íbúum í Bæjarhreppi hægt og þétt eins og í mörgum öðrum sveitarfélögum á landsbyggðinni. Þegar botninum var náð 1999 voru einungis 93 íbúar skráðir í hreppnum. Að sögn Ragnars Pálmasonar oddvita hreppsins fór íbúatalan að síga upp á við, upp úr því, og íbúum hefur verið að fjölga hægt og sígandi síðan.
Fjölgunin hefur verið hvað mest nú seinustu ár, þannig að á milli árana 2002 og 2003 fjölgaði um 7 íbúa og aftur milli 2003 og 2004 fjölgaði þeim um 2. Síðan hefur fjölgað um 5 síðan 1. desember 2004 og í dag eru Bæhreppingar 108. Fjölgunin er um 15% á síðast liðnum 6 árum. Aldursdreifingin í hreppnum er mjög lág, en meðalaldur íbúa í Bæjarhreppi er einungis um 33 ár miðað við 1. des. 2004 og hefur lækkað síðan. Trúlega þarf að líta til sveitafélaganna á Stór-Reykjavíkursvæðinu til að sjá sambærilega þróun.
![](wp-content/uploads/hrutafjordur/350-skolinn_bordeyri2.jpg)
Áslaug Ólafsdóttir starfsmaður hreppsins á skrifstofunni
Fjölgunin hefur fyrst og fremst verið fólgin í því að ungt fólk hefur í töluverðu mæli flutt í hreppinn og tekið við bújörðum af eldra fólki. Þetta hefur svo aftur haft þær afleiðingar í för með sér að mörg börn hafa fæðst í hreppnum á undanförnum árum. Fólk hefur einnig flutt í hreppinn vegna starfa sem fjölgað hefur í hreppnum, m.a. vegna aukinna umsvifa Grunnskólans.
Um 1995 náði barnafjöldi á grunnskólaaldri lágmarki í hreppnum, en þá voru þau ekki nema 4 talsins. Var þá Grunnskólanum á Borðeyri lokað tímabundið og þjónustan sótt að Reykjum. En frá haustinu 2001 hefur Grunnskólinn verið rekinn á Borðeyri og eru nú 19 börn í fyrsta til sjötta bekk og önnur fjögur eru í efri bekkjum grunnskóla í Húnaþingi vestra, samtals 23 börn á grunnskólaaldri. Dagvistun er einnig rekin samhliða Grunnskólanum og eru fimm börn á þeim aldri og önnur sex þar undir, samtals 34 börn.
![](wp-content/uploads/hrutafjordur/skolinn2005/350-skolinn_bordeyri3.jpg)
![](wp-content/uploads/hrutafjordur/skolinn2005/350-skolinn_bordeyri.jpg)
Skólabörnin á Borðeryi og skólahúsið
Að sögn Kristínar Árnadóttur skólastjóra þá er Grunnskólinn á Borðeyri á skrá hjá Kennaraháskóla Íslands sem viðtökuskóli kennaranema í vettvangsnámi. Síðan skólinn fór aftur í gagnið haustið 2001 hafa stöðugt verið kennaranemar við skólann og hafa þeir komið víða að. Tveir kennaranemar eru um þessar mundir við nám í skólanum þær Jóna Guðrún Ármannsdóttir í Laxárdal og Marí Kristín Sævarsdóttir frá Sauðárkróki. Grunnskólinn á Borðeyri hefur sótt um aðild að "skólum á grænni grein" sem þýðir að skólinn markar sér umhverfisstefnu og starfar eftir því.
![](wp-content/uploads/hrutafjordur/skolinn2005/580-skolinn_bordeyri.jpg)
Grunnskólabörnin og hluti dagvistunarbarna og með þeim Kristín Árnadóttir skólastjóri lengst til hægri, Katrin Kristjánsdóttir kennari önnur frá vinstri og Sigurlaug Árnadóttir dagvistunarstjóri lengst til vinstri.
Í raun eru íbúar í Bæjarhreppi nokkuð sjálfum sér nógir með flest, því þar er til staðar stór hluti þeirrar þjónustu sem eitt sveitarfélag þarf á að halda. Auk skólans er þar rekin m.a. verslun og sparisjóður, einnig er rekin þar ýmis önnur þjónusta sem gott er að hafa í nálægð. Bæjarhreppur rekur eigin brunavarnir, Brunavarnir Bæjahrepps, og nýverið var bætt við öflugum slökkvibíl í tækjakostinn, sem staðsettur er á Borðeyri. Til gamans má geta að hreppurinn er næstminnsta sveitafélag landsins sem rekur eigin brunavarnir.