Nemendur gera hundatal fyrir Árneshrepp

Þessa dagana er nemendurnir í Finnbogastaðaskóla í Trékyllisvík að vinna þema um náttúru Árneshrepps út frá ýmsum sjónarhornum. Nemendurnir gerðu m.a. nýverið rannsókn á hundatali í sveitinni sem er hluti af námi samfélagsfræði en þáttur í rannsókninni er að skoða dýralífið og allt nánasta umhverfi nemendanna. Í Árneshreppi eru búsettir tólf hundar um þessar mundir auk þess sem einn hundur er gestur í sveitinni um tíma. Kynskipting hundanna í sveitinni er frekar tíkunum í hag, þó það fari auðvitað eftir því hvernig á það er litið, en þær eru níu á móti þremur hundum auk Spora sem er sá sem er gestkomandi. Nemendur í Finnbogastaðaskóla í vetur eru tvær stúlkur, sjö ára og tíu ára.