by 
„Ég hef langmestar áhyggjur af Galdra-Möngu, en við sendum hrafninn af stað til Malaví árla síðasta sunnudag og það er erfitt að kalla hana til baka," sagði galdramaður af Ströndum þegar tíðindamaður strandir.saudfjarsetur.is innti hann eftir viðbrögðum Strandagaldursmanna við nýjustu fréttum BBC, að forseti Malaví, Bingu wa Mutharika, hefði fyrirskipað handtökur á tveim malavískum blaðamönnum og einum opinberum starfsmanni fyrir að brigsla hann opinberlega um draugahræðslu.
„Ég hef aldrei séð draug," sagði forsetinn þegar hann kom til baka úr heimsókn frá Belgíu „og ég er sko ekkert hræddur við þá," en var greinilega mjög brugðið.
„Jú, að sjálfsögðu stendur manni ekkert á sama," sagði galdramaðurinn af Ströndum, en eins og kom fram í fréttum á strandir.saudfjarsetur.is fyrir skömmu þá bauðst Strandagaldur til að leggja forseta Malaví, Bingu wa Mutharika, lið í draugaganginum. „Maður veit aldrei upp á hverju þessir andskotar geta tekið. Við sendum honum tölvupóst á sunnudaginn og sendum svo hrafninn af stað með samanrúllaðan samning í vinstri klónni samdægurs, en Manga er líklega á flögri einhversstaðar yfir Frakklandi þessa stundina," sagði galdramaðurinn og bætti við „ég vona bara að Hr. Bingu sendi ekki flugherinn á hana".
Forseti Malaví, Bingu wa Mutharika, telur draugafréttina runna undan rifjum Bakili Muluzi, fyrrverandi forseta. Blaðamennirnir standa við frétt sína um að Mutharika forseti hafi flúið draugagang. Samtök fjölmiðlamanna í Afríku hafa tekið málið í sínar hendur og segja malavísku ríkisstjórnina beita lögum til að þagga niður í fjölmiðlum, og að draugafréttin hafi valdið óskiljanlegri hræðslu í stjórnkerfinu.
„Ég segi nú ekki að ég sé hræddur við Hr. Balu, eða hvað hann nú heitir," segir galdramaðurinn, „en allur er varinn góður, og í dag ætla ég að dunda mér við að finna rétt efni til að gera mig ósýnilegan ef á þarf að halda. Það er talsvert flókin og tímafrek aðgerð en það ætti að hafast fyrir morgundaginn," sagði galdramaðurinn af Ströndum að lokum meðan hann skar galdrastafinn hulinhjálm í surtarbrand til að geyma í vasanum, ef útsendarar Bingu wa Mutharika skyldu birtast á Ströndum einn daginn.
Tengdar fréttir:
Galdramaður sendur til Afríku?
Galdra-Manga tekur við skipunum galdramannsins s.l. sunnudag, áður en hún lagði upp og suður til Afríku með samninginn.
Heimasíða Galdrasýningar á Ströndum
www.vestfirdir.is/galdrasyning
