Heilmikið um að vera um helgina

Heilmikið er um að vera um helgina á Ströndum og fyrst má nefna að árlegt Kvennahlaup Sjóvá og ÍSÍ er haldið í dag, laugardaginn 16. júní. Hlaupið verður á Drangsnesi frá Drangi kl. 11:00 og á Hólmavík frá Söluskála N1 kl. 13:00. Þetta er átjánda árið sem hlaupið fer fram, en árlega taka um 18.000 konur á öllum aldri þátt í hlaupinu. Samstarfsaðili Kvennahlaupsins þetta árið er Hjartavernd, en þema hlaupsins í ár er „Hreyfing er hjartans mál." Í kvöld verða svo tónleikar Hellvar á Hótel Djúpavík, þar sem Heiða og Elvar skemmta, og hefst skemmtunin kl. 21:00.

Á þjóðhátíðardaginn 17. júní verður náttúruskoðun á Degi hinna villtu blóma í Sævangi kl. 11:00 og verður gengið um Orustutanga og gróðurinn þar kannaður. Þjóðhátíðarkaffi er í Sauðfjársetrinu í Sævangi sama dag og heimalningar og hænuungar fá sérstakt þjóðhátíðarfæði.

Á veitingastaðnum Café Riis á Hólmavík verður standandi vöfflukaffi allan daginn af tilefni dagsins.

Hátíðahöld á 17. júní á Hólmavík hefjast kl. 13:30 í hvamminum við kirkjuna og verður boðið upp á andlitsmálun, skrúðgöngu, leiki og skemmtiatriði. Það er ungmennafélagið Geislinn á Hólmavík sem sér um dagskrána. 

Félagsstarf eldri borgara á Hólmavík heldur sýningu á afrakstri vinnunnar í vetur á 17. júní og verður hún í félagsheimilinu á Hólmavík og er opið milli 16:00-18:00.