Galdramenn gerðu víðreist

Galdramenn af Ströndum hafa gert víðreist síðustu daga og tekið þátt í fjölda uppákoma víðsvegar. Jón Jónsson stjórnarmaður í Strandagaldri hélt uppi galdrafjöri á Þjóðminjasafninu á Menningarnótt í Reykjavík á laugardaginn og Magnús Rafnsson stjórnarformaður var á Nýfundnalandi að leita upplýsinga um baskneska hvalfangara, en þeir stunduðu einnig viðamiklar hvalveiðar frá Ströndum fyrr á tíð. Ólafur Ingimundarson og Sigurður Atlason héldu í víking til Noregs og táku þátt í viðamikilli galdraráðstefnu ásamt Árna Páli Jóhannssyni sem er útlitshönnuður Galdrasýningar á Ströndum.

Nú eru þeir allir komnir heim og ánægðir með afrakstur undanfarinna daga. Um 200 manns sóttu fyrirlestra Jóns í Þjóðminjasafninu og Magnús kom margs vísari um baskneska hvalveiðimenn frá Nýfundnalandi. Ferð þeirra Sigurðar og Ólafs lukkaðist ekki síður en þeir komu með heim í farteskinu handsal um Evrópusamstarf við Norðmenn um uppbyggingu galdrasýninga í þrem löndum, Íslandi, Noregi og Skotlandi. Frammistaða Sigurðar á ráðstefnunni sem var haldin í Vardö í Norður Noregi vakti mikla athygli og birtist um það frétt í dagblaðinu Finnmarker sem er stærsta blaðið sem gefið er út í fylkinu. Greinina er hægt að nálgast hér.

Þess má geta að Norðmennirnir munu sækja Strandir heim nú á haustmánuðum og vinna áfram í hugmyndavinnu vegna samstarfs þessara aðila.