by 
Fréttaritari strandir.saudfjarsetur.is átti tvívegis leið um Bitru í dag og sá tvo refi á ferðum sínum þar um sveit. Báðir gáfu kost á myndatöku. Sá fyrri sem fékk nafnið Bitrungur bragðarefur lá makindalegur við veginn ofan við Brekkurekann og lét fara vel um sig. Virtist hann saddur og sæll og sýndi ekkert fararsnið á sér þótt ljósmyndari væri eitthvað að brölta á veginum rétt í grenndinni. Síðari rebbinn sem fékk nafnið Óspakur eggjaþjófur var hins vegar við störf og rannsóknir við Bitrufjarðarbotn við litla hrifningu kríunnar og fleiri fugla sem viðstaddir voru. Hann fór undan í flæmingi þegar ljósmyndari myndaði vélina.
Ljósmyndir – Jón Jónsson
