by 
Nú fer að líða að lokum tippleiks strandir.saudfjarsetur.is og hver fer að verða síðastur til að láta ljós sitt skína í getspánum sem hafa birst vikulega í allan vetur. Nýliðinn að þessu sinni er Ágúst Einar Eysteinsson (Gunnarssonar á Hólmavík). Hann etur kappi við Baldur Smára Ólafsson sem náði níu réttum um síðustu helgi í æsispennandi keppni. Spár þeirra Baldurs og Gústa eru keimlíkar og lítill munur á leikjunum fimm sem þeir eru ósammála um, en helsti sénsinn sem er tekinn er sá að Gústi tileinkar stjórnanda leiksins spá sína í síðasta leiknum. Hvort það borgar sig kemur í ljós á morgun, en þangað til er hægt að dunda sér við að skoða spár kappanna:
1. Fulham – Arsenal
Baldur: Arsenal náði ekki jafntefli á seinustu helgi gegn Blackburn eins og ég hafði spáð. Þeir rífa sig hinsvegar upp úr skítnum núna og ná jafntefli gegn Fulham. Tákn: X.
Gústi: Hef trú á að Arsenal taki sig saman í andlitinu og vinni Heiðar og félaga í Fulham. Tákn: 2.
+++
2. West Ham – Everton
Baldur: West Ham eru með gott lið og fara létt með vesalingana í Everton. Tákn: 1.
Gústi: West Ham er spútnikliðið þetta tímabilið. Tákn: 1.
+++
3. Newcasle – Bolton
Baldur: Þetta er nokkuð snúinn leikur. En ég spái því að Newcastle vinni þetta svona 1-0. Tákn: 1.
Gústi: Newcastle á góðu skriði eftir að hafa loksins losað sig við Souness taka Bolton örugglega. Tákn: 1.
+++
4. Aston Villa – Portsmouth
Baldur: Aston Villa ætti að hafa þetta nokkuð örugglega. Því Portsmouth eru búnir að vera svakalega slappir á þessari leiktíð þrátt fyrir að vera með ágætis leikmenn. Tákn: 1.
Gústi: Tvö slöpp lið spila slappan leik endar 0-0. Tákn: X.
+++
5. Middlesbro – Birmingham
Baldur: Middlesbrough eru komnir í gang og fara létt með Birmingham. Tákn: 1.
Gústi: Birmingham í meiðslavandræðum og Hasselbank kominn á skotskóna. Miltisbrandurinn tekur þetta örugglega. Tákn: 1.
+++
6. Burnley – Reading
Baldur: Pottþéttur útisigur. Reading eru einfaldlega of sterkir fyrir Burnley. Tákn: 2.
Gústi: Reading eru sterkir og vinna þennann örugglega. Tákn: 2.
+++
7. Watford – Derby
Baldur: Watford eru í mikilli baráttu um sæti í úrvalsdeildinni. En Derby eru hinsvegar þar sem þeir eiga heima… í neðrihlutanum. Tákn: 1.
Gústi: Watford eru á leið upp í úrvalsdeild en Derby ekki. Tákn: 1.
+++
8. C. Palace – Leeds
Baldur: Mikilvægur leikur fyrir bæði lið. En Palace eru erfiðir heim að sækja og vinna þetta 2-1. Tákn: 1.
Gústi: Iain Dowie er töff þannig að ég tippa á hann. Tákn: 1.
+++
9. Preston – Ipswich
Baldur: Preston eru með fínt lið og ættu að vinna Isspiss. Tákn: 1.
Gústi: Þekki ekki þessi lið þannig að ég úllen dúllen doffa bara. Tákn: 1.
+++
10. Cardiff – Sheff.Wed.
Baldur: Ég held að Cardiff vinni þetta létt. Sheff. Wed. eiga eftir að falla niður um deild. Tákn: 1.
Gústi: Áfram Wales! Tákn: 1.
+++
11. Q.P.R. – Wolves
Baldur: Tvö lið með flott nöfn, þetta verður flottur leikur. Q.P.R. vinna 4-3. Tákn: 1.
Gústi: Hvað er Paul Ince orðinn gamall? Tákn: X.
+++
12. Norwich – Stoke
Baldur: Ég held að það sé ekki mikill getumunur á þessum liðum, en tippa á Norwich því þeir eru á heimavelli. Tákn: 1.
Gústi: Miðjumoð. Tákn: X.
+++
13. Southampton – Coventry
Baldur: Þrátt fyrir að Coventry hafi Dennis Wise í sínu liði þá tapa þeir þessu nokkuð auðveldlega eins og þeim einum er lagið. Tákn: 1.
Gústi: Tippa á Coventry fyrir Adda. Tákn: 2.
+++
Baldur: Ég hef á tilfinningunni að ég eigi eftir að mala andstæðing minn 7-1, eins og lið mitt Nottingham Forest malaði sinn andstæðing á seinustu helgi.
