Þriðji ísbjörninn mættur á Hamingjudaga

Í gönguferð á föstudagskvöld á Hamingjudögum á Hólmavík með leiðsögn Jóns Alfreðssonar mættu göngumenn björgunarsveitarmanni sem benti þeim á þreytulegan ísbjörn sem lá þar í laut í grenndinni. Kom í ljós við nánari eftirgrennslan að þarna var Þríbjörn sjálfur mættur, þriðji björninn sem heimsækir Ísland í vor. Þríbjörn er vingjarnlegur bangsi sem urraði heilmikið, en rétti þó fram hramminn og heilsaði Einari Ögmundssyni með virktum eins og sjá má á mynd hér að neðan, virtist kannast við hann.

Eins og allir vita eru ísbirnir hættulegir, þannig að menn gengu í að reyna að svæfa björninn og gaf Snorri Jónsson gaf honum bjór sem hann svolgraði í sig með bestu lyst. Fór hann síðan glaður í bragði inn í búr og farið var með hann niður í Hólmadrang og þar er hann nú alveg rorrandi að gæða sér á rækjum.

Í Bragganum var spurningakeppnin Drekktu betur sem Arnar Jónsson og Gunnar Melsteð stýrðu. Þar var líf og fjör eins og stendur í texta Hamingjulagsins, mjög góð þáttaka og stemmning. Harpa Hlín Haraldsdóttir og Hinrik Þór Svavarsson stóðu að lokum uppi sem sigurvegarar.

Ísbjörninn Þríbjörn mættur til Hólmavíkur – ljósm. Svanhildur Jónsdóttir