strandir.saudfjarsetur.is í Extreme European Web-MakeOver

Fréttavefurinn strandir.saudfjarsetur.is hefur verið valinn þátttakandi í alþjóðlegu verkefni um nýjungar í vefsmíði. Felst verkefnið í því að vel valinn alþjóðlegur fimm manna hópur vefhönnuða, tískuráðgjafa og hugmyndasmiða mætir á Strandir og tekur vefinn í gegn. Bæði verður hugað að tekjumöguleikum, rekstrarfyrirkomulagi, hönnun og útliti vefjarins og innlitum á hann. Jafnframt verður hugað að hegðun, atferli og framkomu ritstjórnar og fréttaritara, auk þess sem reynt verður að koma klæðaburði þeirra og tískuvitund í betra horf. Heimildamyndagerðarmenn verða í för með vef- og útlitshönnuðum og munu fylgjast með breytingunum í 3-4 vikur.

Ætlunin er að gera heimildamynd um þá umbreytingu sem verður á vefnum og tveimur sambærilegum héraðsfréttavefjum. Er annar í Króatíu og hinn í Tyrklandi, en öll þessi lönd sækjast nú eftir inngöngu í Evrópusambandið og er verkefnið stutt af sambandinu.