Strandhögg í Þýskalandi

Keppnin í Formúlu 1 er komin á fullan skrið og kappakstur helgarinnar er haldin á hinni fornfrægu Nurburgring í Þýskalandi. Strandamenn hafa mikinn áhuga á íþróttinni eins og sést á Liðsstjóraleik vefjarins formula.is, en þar er sveitin strandir.saudfjarsetur.is í öðru sæti af 314 sveitum. Nokkrir formúlufíklar af Ströndum gerðu sér lítið fyrir og skruppu til Þýskalands á fimmtudaginn og eru nú staddir í stúku við rásmarkið á Nurburgring, en þar hefst tímataka kl. 11:50 í dag og síðan keppnin kl. 12:00 á morgun. Það er því vert að hafa augun hjá sér og svipast um eftir kunnuglegum andlitum í sjónvarpinu!

Eftir bestu vitneskju strandir.saudfjarsetur.is eru það þau Karl Þór Björnsson, Helga Rut Halldórsdóttir, Sverrir Valur Lýðsson og Jón Gísli Jónsson sem eru stödd í Þýskalandi þessa stundina. Þess má að lokum geta að Ferrari-guttarnir Michael Schumacher og Felipe Massa náðu bestu tímum á lokaæfingu fyrir tímatöku, en þar skammt á eftir var Ralf Schumacher á Toyota-bíl. Öll þessi lið keyra á Bridgestone-dekkjum.