Söngkeppni og diskótek í kvöld

Það verður nóg um að vera á Hólmavík í kvöld, laugardagskvöldið 1. nóvember, en þá verður árleg söngkeppni haldin í Bragganum á Hólmavík. Keppnin hefst kl. 20:30, en í ár keppa níu aðilar frá hinum ýmsu vinnustöðum til sigurs og salurinn kýs sigurvegara. Barinn verður opinn og aðgangseyrir er aðeins kr. 1.500, en yngri kynslóðin er að vanda boðin velkomin á generalprufu sem verður kl. 14:30 í dag. Sönglagalista og röð keppendanna níu er að finna hér að neðan. Eins og venjulega er um fjölbreyttar lagsmíðar að ræða, allt frá unaðstæru píkupoppi upp í graðhestadiskó. Kynnir kvöldsins verður Kristín S. Einarsdóttir. Eftir keppni verður síðan haldið diskótek á Café Riis undir stjórn Arnars Jónssonar, en ókeypis er inn á diskótekið sem mun standa fram á rauða nótt.