by 
Óhætt er að segja að félagsheimilið á Hólmavík hafi iðað af tónlist, lífi, leik og fjöri undanfarnar vikur, en þar hafa mætt ýmsar furðupersónur til að taka þátt í Skilaboðaskjóðunni. Þetta skemmtilega barnaleikrit með söngvum og spilerí verður frumsýnt á laugardag kl. 14:00 og önnur sýning er strax á sunnudag á sama tíma. Leikritið er eftir Þorvald Þorsteinsson og tónlist eftir Jóhann G. Jóhannsson og var frumflutt í Þjóðleikhúsinu 1993. Uppsetningin hér er í samstarfi Grunn- og tónskólans á Hólmavík og Leikfélags Hólmavíkur. Leikstjóri er Esther Ösp Valdimarsdóttir og tónlistarstjórn er í höndum Hildar Heimisdóttur. Leikarar eru fjölmargir nemendur úr 8.-10 bekk Grunnskólans og einnig úr dreifnámi Fjölbrautaskóla Norðurlands vestra á Hólmavík.
Áhorfendur eru hvattir til að tryggja sér miða sem fyrst á þessa skemmtilegu sýningu en sýningar fara fram í Félagsheimilinu á Hólmavík og eru sem hér segir:
Frumsýning laugardaginn 5. apríl kl. 14.00
2. sýning sunnudaginn 6. apríl kl. 14.00
3. sýning miðvikudaginn 9. apríl kl. 19.00
4. sýning páskadag 20. apríl kl. 19.00
Lokasýning 2. páskadag 21. apríl kl. 14.00
Miðapantanir eru hjá Ester miðasölustjóra í síma 693-3474.
Ljósm. af æfingum á Skilaboðaskjóðunni – Jón Jónsson
