by 
Undanfarna daga hefur vorið haldið innreið sína á Ströndum með hlýju veðri og hopandi snjó. Þegar þessi árstími er kominn getur tekið á að þurfa að sitja inni yfir námsbókum eða í vinnu fyrir framan tölvuna. Þetta vita krakkarnir í 4. bekk Grunnskólans á Hólmavík mætavel og því gerðu þeir sér dagamun í dag, tóku sér frí frá heðfbundnu námi og skruppu með Hildi Guðjónsdóttur umsjónarkennara og Arnari S. Jónssyni gestakennara út í góða veðrið, til að grilla pylsur og heimatilbúið brauð og poppa á afar óhefðbundinn máta. Myndavélin var að sjálfsögðu með í för og afraksturinn má sjá hér fyrir neðan.
Útivistarferðin var hluti af verkefni Arnars vegna náms í Kennaraháskólanum, en þar stunda fjölmargir Strandamenn nám um þessar mundir eins og síðustu ár.
Sólin skein á konur og karla í dag.
Arnar útskýrir matargerðina fyrir áhugasömum nemendum. Pylsur voru þræddar upp á trjágreinar og ljúffengt brauðdeig vafið utan um þær.
Það er gott að slaka á í forsælunni.
Hópurinn byrjaður að grilla pylsurnar yfir náttúrugerðu kolagrilli.
Sunneva Guðrún ánægð með lífið og tilveruna, enda pylsan tilbúin.
Grillað af miklum móð.
Nýstárleg aðferð við að poppa – hér er enginn örbylgjuofn.
Piltarnir gæða sér á brimsöltu poppi beint úr sigtinu.
Ljósm. Hildur Guðjónsdóttir.
