by 
Undanfarin ár hefur færst mjög í vöxt að húsbílaeigendur sem eiga leið um Hólmavík reyni að forðast tjaldsvæði bæjarins, sennilega til að losna við gjaldtöku. Í kvöld var til dæmis átta húsbílum lagt á bryggjunni í þorpinu, en þar er harðbannað að leggja bílum. Bílunum var keyrt burt um 23:00 eftir ábendingu um að ólöglegt væri að leggja á bryggjunni. Þeir færðu sig þó ekki langt því öllum bílunum var lagt til næturdvalar í íbúðahverfi gegnt tjaldsvæði bæjarins. Þrátt fyrir vinsamlegar ábendingar frá fréttaritara strandir.saudfjarsetur.is um að tiltölulega ódýrt og gott tjaldsvæði væri handan götunnar færðu bílarnir sig ekki fet.
Ábendingunum var í raun mjög illa tekið og ferðalangarnir, sem eru af erlendu bergi brotnir, voru afar svekktir yfir slappri gestrisni Hólmvíkinga. Reikna má með að einhverjir þeirra telji sig ekki hafa efni á því að greiða tjaldsvæðisgjald sem þó er í lægri kantinum á Hólmavík og engin aukagreiðsla er fyrir húsbíla. Uppbygging á tjaldsvæðinu á Hólmavík hefur verið mikil undanfarin ár og ljóst má vera að slíku verkefni fylgir ærinn kostnaður.
Þetta mál er engan veginn nýtt af nálinni eins og kom fram á strandir.saudfjarsetur.is í fyrrasumar.
Húsbílarnir á bryggjunni. Eins og sjá má er bannskiltið eingöngu á íslensku, en þó ætti erlendu fólki að vera ljóst að bryggjur eru ekki ætlaðar sem húsbílastæði.
Bryggjan þröngt setin af bílunum.
Húsbílarnir komnir á bílaplan við Víkurtún. Þaðan færðu þeir sig ekki þrátt fyrir ábendingar um að tjaldsvæði væri í seilingarfjarlægð.
Þessi mynd er tekin af nýrri hluta tjaldsvæðisins á sama tíma. Þar er nóg pláss og fín aðstaða.
Ljósm. Arnar S. Jónsson
