Möguleikar á margvíslegum styrkjum

Fjölmargir sjóðir hafa auglýst styrki á síðustu vikum til margvíslegra málefna. Einn þeirra er Pokasjóður sem styrkir verkefni á sviði umhverfismála, menningar, íþrótta og mannúðarmála, en umsóknarfrestur rennur út á morgun, 7. mars. Nýsköpunarsjóður námsmanna er annar sjóður þar sem rannsóknastofnanir og fyrirtæki fá tækifæri til að ráða námsmenn í grunnnámi við háskóla til sumarvinnu við metnaðarfull og krefjandi rannsóknarverkefni, en frestur til að sækja í hann er til 10. mars. Menningarráð Vestfjarða hefur einnig auglýst eftir styrkumsóknum í fyrri úthlutun 2008 og er frestur þar til 14. mars.

Frestur til að sækja um í Fornleifasjóð er einnig til 14. mars og sama gildir um Menningarsjóð Finnlands og Íslands. Af öðrum sjóðum sem auglýst hafa eftir styrkjum má nefna Bókmenntasjóð, en frestur til að sækja um styrk í hann rennur út 15. mars næstkomandi. Einnig er rétt að minna á að næst rennur út frestur til að sækja um í Æskulýðssjóð þann 1. apríl, en sá sjóður auglýsir eftir styrkumsóknum fjórum sinnum á ári.

Næsti umsóknarfrestur um Frumkvöðlastuðning frá Impru rennur út 15. mars. Markmið Frumkvöðlastuðnings er að styðja við nýsköpunarhugmyndir einstaklinga og smærri fyrirtækja með því að veita styrki til verkefna sem stuðla að framþróun viðskiptahugmynda. Einstaklingar og fyrirtæki á landsbyggðinni eru sérstaklega hvött til að senda inn umsókn að þessu sinni.

Vefurinn strandir.saudfjarsetur.is hvetur alla Strandamenn sem standa fyrir verkefnum á þessum sviðum til að sækja um styrki úr þeim sjóðum sem standa til boða. Það eru einungis þeir sem róa til fiskjar sem fá.