by 
Það var mikið fjör á þorrablóti á Hólmavík í gær, ljómandi góður matur frá veitingastaðnum í þorpinu, Café Riis, þétt og góð skemmtiatriði og hljómsveitin Úlrik stóð fyrir sínu og hélt uppi góðu stuði á dansleiknum. Á Hólmavík er hefðin sú að konurnar sjá alfarið um þorrablótið og er skipuð 8-10 kvenna nefnd hverju sinni. Ný nefnd er kosin kynnt á hverju þorrablóti og þannig veltur keflið áfram ár eftir ár. Á móti sjá karlar um Góugleði síðar um veturinn en sú skemmtun er mjög með sama sniði og þorrinn, þó að frátöldum matnum, sem skiptir miklu máli að sé vel súr á þorranum. Ávallt eru frumsamin og leikin skemmtiatriði og þótti leikþátturinn nú óvenju þéttur og vel æfður. Þar er gert grín að Strandamönnum og atburðum liðins árs og stundum gengið mjög fast fram í gríninu. Nefndarvísur þar sem ort er á gamansaman hátt um nefndarkonurnar sjálfar eru jafnan sungnar til skemmtunar, svo ekki sé hægt að segja að nefndin fá ekki sinn skerf af gríninu. Fréttaritari tók allmargar myndir af skemmtiatriðunum, en eins og venjulega var myndavél strandir.saudfjarsetur.is hins vegar lögð á hilluna þegar dansinn hófst.
Þorrinn á Hólmavík – ljósm. og texti Jón Jónsson
