Búferlaflutningar 2005

Hagstofa Íslands hefur birt talnaefni um búferlaflutninga á árinu 2005 eftir svæðum, byggðakjörnum og sveitarfélögum. Eins og venjulega er þarna á ferðinni áhugavert efni til að glugga í eins og sjá má í töflu hér neðar, en í þessum tölum koma fram flutningar fólks á lögheimili þess, án tillits til fæddra og dána. Samkvæmt Hagstofunni hafa 44 flutt í sveitarfélög á Ströndum á árinu, en 75 úr þeim. Munurinn er þannig óhagstæður um 31 og munar þar mestu um að 20 fleiri fluttu úr Hólmavíkurhreppi en í hann á árinu. Inni í þessum tölum eru ekki taldir þeir sem flytja sig um set innan sveitarfélaganna, en þær upplýsingar er einnig hægt að nálgast á vef Hagstofunnar – www.hagstofan.is.