by 
Það var heilmikið af vatni sem fangaði athyglina á ökuferð um Djúpið í gær og er það mál manna að sjaldan hafi sést aðrir eins vatnavextir í Ísafirðinum og Mjóafirði í gær. Ár brutust fram barmafullar og rúmlega það, vegir skemmdust víða og vegslóðar fóru undir vatn, eins og sést glögglega á meðfylgjandi myndum sem Þórður Halldórsson á Laugarholti tók í Djúpinu og Staðardal í gær. Vegurinn við Gervidal var opnaður aftur í gærmorgun, en einnig þurfti að fara í vegabætur í Mjóafirði og á Eyrarfjalli. Björgunarsveitin á Hólmavík var kölluð út til að koma böndum á flotbryggju sem losnaði á Tyrðilmýri á Snæfjallaströnd. Von er á fleiri myndum af vatnsveðrinu hér á vefnum.
Brúin yfir Hvannadalsá
Flæðir yfir veg á Þorskafjarðarheiðinni
Vegaskemmdir í Ísafirði
Svona leit vegurinn um Eyrarfjall út í gærmorgun þar sem rann yfir hann á þremur stöðum
Botnsá í Mjóafirði hefur grafið sig inn í veginn
Áin hafði líka grafið frá brúnni yfir Botnsá
Í Staðardalnum – vatnsborðið virðist hafa verið meter hærra en þarna þegar hæst var, miðað við polla sem eftir sátu
Frammi í Langadal – Ljósm. Þórður Halldórsson
